NETA V3A

Título do proxecto: NETA V3A Asistente virtual para o envellecemento activo-Virtual Assistant For Active Aging

Membros do consorcio: Atendo Calidade S.L., Balidea Consulting & Programming S.L., Soluciones Conceptuales e Innovación S.L. (FrutoDS), Ledisson A& IT, S.L.

Centros de investigación participantes: Centro Tecnolóxico de Telecomunicacións de Galicia (GRADIANT).

O obxectivo xeral de NETA V3A é desenvolver un robot asistencial 100% galego que axude ás persoas maiores a permanecer na súa contorna o maior tempo posible, fomentando hábitos de vida saudable, apoiando tratamentos farmacolóxicos e médicos, monitorando e ofrecendo seguridade. De igual maneira, preténdese que o noso Robot non só cumpra cunha tarefa asistencial, senón tamén social, proporcionando acompañamento mediante intelixencia artificial e facilitando as videochamadas, así como fomentando unha participación activa da persoa na súa contorna. No seu conxunto NETA V3A, pretende ser unha ferramenta de prevención, un verdadeiro asistente persoal de empoderamento en envellecemento activo.

NETA V3A comezou en xuño de 2018 e rematou en decembro de 2020.

Principais resultados: Neste proxecto logrouse desenvolver un robot social para o fomento da vida activa, que é capaz de desprazarse de maneira autónoma e localizar ao usuario dentro do seu domicilio. Desenvolveuse unha aplicación para mellorar a vida activa, a saúde e a participación social para favorecer un envellecemento saudable e loitar contra a soidade. Para o uso da aplicación e o robot dunha maneira sinxela por parte do usuario e sen barreiras tecnolóxicas, desenvolveuse un bot conversacional en castelán e galego. Todos os desenvolvementos e formulacións xorden desde a perspectiva da Atención Centrada na Persoa e desde os profesionais sociosanitarios e usuarios dos seus servizos que participaron activamente no deseño e validación.

Proxecto subvencionado pola Axencia Galega de Innovación ( GAIN) e apoiado pola Consellería de Economía, Emprego e Industria, a través do programa Conecta Peme para fomentar a cooperación entre as pemes e os demais axentes do Sistema rexional de innovación, cofinanciado polo Fondo Europeo de Desenvolvemento Rexional, FEDER, da Unión Europea.