Balidea logrou dous Splash Awards na Drupal Camp Spain 2019, o maior evento desta tecnoloxía que se celebra en España. Estes premios recoñecen os mellores proxectos do ano en España desenvoltos con Drupal. Os premios recolleunos este xoves en Conil de la Frontera (Cádiz) o director de Desenvolvemento e Produción TIC de Balidea, Diego Arias.

Das nove categorías existentes, Balidea triunfou en dúas.

Mellor web de educación: Universidade de Vigo

O novo portal da Universidade de Vigo, https://www.uvigo.gal, foi premiado como a mellor web na categoría “Education”. O portal viu a luz en maio de 2018, tras un proceso que arrincou meses antes coa participación de varios equipos baixo a coordinación da área TIC da universidade. Balidea encargouse do desenvolvemento do portal, empregando Drupal 8. Deste proxecto destaca especialmente a reutilización de información grazas á conexión coas aplicacións de xestión coas que conta a universidade, recollendo información como o directorio, os avisos, a normativa, as convocatorias, os cursos, as actividades, as noticias e os eventos da axenda.

Mellor web gobernamental: Les Corts  Valencianes

No apartado “Government” a web gañadora do Splash Award foi a de Les Corts  Valencianes,  https://www.cortsvalencianes.es, que se publicou en outubro do ano pasado.  Balidea desenvolveu esta web en Drupal 8. Trátase dun proxecto multisite con catro partes diferenciadas: o portal xenérico, o de Transparencia, o de Participación cidadá e a intranet de uso interno para todo o persoal de Les Corts. Entre as súas características destaca o acceso directo a plenos en tempo real, a xestión da documentación parlamentaria e a consulta histórico de lexislaturas, así como a integración de redes sociais e a implementación dun sistema de comentarios.

Finalistas nos premios europeos

Ambas as webs desenvoltas por Balidea participarán agora nos Global Splash  Awards, que premian os mellores proxectos a nivel europeo. Estes premios entregaranse na DrupalCon Europe 2019, que se celebrará en Amsterdam do 28 ao 31 de outubro.

Agradecementos

Balidea agradece á Asociación Española de Drupal e ao xurado a elección dos nosos proxectos como merecedores dos premios e á Universidade de Vigo e a Les Corts Valencianes a confianza na nosa empresa para desenvolver as súas webs. Balidea estende o agradecemento de forma especial ao equipo de profesionais da empresa que traballou en ambos os proxectos, sen os que estes galardóns non serían posibles.