Balidea vén de participar no Best Outsourcing Pratices Meetup organizado en Gliwice (Polonia) pola empresa local XSolve para compartir a súa experiencia e coñecemento na prestación de servizos tecnolóxicos a nivel internacional. O encontro tivo lugar o pasado xoves 22 de febreiro e nel estiveron presentes outras empresas tecnolóxicas de Holanda, Dinamarca, Italia, Alemaña, Sudáfrica e Cataluña.
No evento interveu Iago Fernández Bugallo, director de proxectos internacionais de Balidea, que destacou a importancia de achegarlle un valor engadido ao cliente. “Balidea non só presta servizos, senón tamén talento. Os nosos profesionais son capaces de entender ao cliente máis aló das súas necesidades concretas de software, axudándolle a mellorar o seu negocio”, engadiu.
Trátase do segundo encontro deste tipo promovido por XSolve, que decidiu contactar con Balidea pola súa grande experiencia na externalización de servizos tecnolóxicos a nivel internacional. Para Balidea foi unha oportunidade para coñecer como empresas do seu sector prestan servizos similares, poñer en común boas prácticas e identificar cales son as principais liñas de traballo no ámbito do outsourcing tecnolóxico.
Provedor da Axencia Danesa da Enerxía, a EFCA ou a ONU
A expansión de Balidea desenvolveuse nos últimos anos dunha forma moi orgánica, asentándose alí onde aumentaba a súa carga de traballo e estratexicamente orientada cara ao resto de Europa, en especial aos países nórdicos, coa filosofía da prestación dun servizo de software factory dende España.
Desta forma Balidea traballou en máis de 400 proxectos na Unión Europea. Entre os seus clientes internacionais figuran entidades como a Axencia Danesa de Enerxía, o Concello de Copenhague, a European Fisheries Control Agency (EFCA) da Comisión Europea ou as Nacións Unidas (ONU); Balidea é dunha das escasas compañías españolas provedora de servizos TIC para esta organización.